"مار "ھر شپ من ءَ واب ءَ گند اَنت ... ڈاکٹر اسلم دوستین

“مار “ھر شپ من ءَ واب ءَ گند اَنت

ڈاکٹر اسلم دوستین

ٹی ایس ایلیٹؔ، اِے گُشگ ءَ رد نہ اِنت کہ:
“The language is oxygen of mind”
لبز، زندگی اِنت، ءُ بے آکسیجن ءَ، زندگی تُشے، ہم نہ گوزیت۔
باریں کئے ءَ گُشتگ کہ:
“A word is worth a trillions of pictures”
بلراج منراؔ ءِ، یک کارستے، اے حَدّ ءَ گُشیت کہ:
“ایشی ءِ لبزاں پچ بہ گر اِت، ءُ پدا ایشی ءِ جند ءَ را آزات بہ کن اِت۔۔۔۔”
لبز ءِ چونیں ارزشتے؟
کہ، تئی، بندگ، جَنَگ ءُ پروشگ ءُ، بیگواہ کنگ ءَ چہ پیشتر، ۔۔۔۔ تئی لبزاں پُل اَنت ءُ ترا، بے سلاہ کن اَنت۔۔۔۔۔
نوکیں دنیا، یک ڈیجیٹل ورلڈے، گوں تینزی ءَ لبزاں ایر برگ ءَ اِنت۔ اے ڈیجیٹل ورلڈ ءِ تہ ءَ تو، ایوک ءَ یک نمبرے ئے، یک ڈاٹے ئے، یک نکتہے ئے،
یک تہاری یے ئے، ءُ تہاریں انبار ءُ کباڑخانہ ءَ کپتگیں ڈیجیٹ ءُ ڈیٹایے ئے۔۔۔ ھمے پیدائشت ءِ نمبر اِنت۔ ھمے تئی اسکول ءِ نمبر اِنت، ھمے تئی بینک ءِ نمبر اِنت، ھمے تئی شناختی کارڈ ءِ نمبر اِنت ءُ ھمے تئی کبر ءِ نمبر اِنت۔ ھمے بے تام ءُ بے بوہ ءُ باسیں نمبر تئی قصہ اِنت۔ ءُ موتک ءُ نازینک اِنت ھم ءُ ۔۔۔ بس، لنکک ءَ سُرین ءُ سیل ءَ بچار۔۔۔۔۔
بَلے اے گپ ءَ کس، فراموش مہ کنت کہ لبز مئے مستریں سِلاہ اَنت۔ ھمے سِلاہ حدائیگ اِنت ءُ ھمے سِلاہ پیغمبراں گون اِنت۔
اگاں من ءَ جُست کن ئے::
اگاں دنیا ءِ تہ ءَحزانگے است اِنت کہ آ تئی اِنت۔ گڑا آ تئی لبز اَنت۔ اگان چیزے، کہ تو دگہ کسے ءَ را دات ئِے نہ کن ئے ۔۔۔۔۔ آ تئی “لبزانک” اِنت۔ لوٹوکیں مردم، تُری تئی ٹیلگ ہم بہ بیت۔
ھر لبز ءِ وتی، چہر ءُ شبینے۔ ۔۔۔
وتی شرف ءُ مقامے ۔۔۔۔
ہامگیں لبز ءِ معنا۔۔۔
ہامگیں زندگی ۔۔۔ بے واد ءُ بے تامیں زندگی۔۔۔ یا کہ تو بگش کہ ۔۔۔۔ چہ آپ ءَ روگن ءِ کشّگ۔۔۔۔ ءُ آپ ءِ منتگ ءَ ، نیمگ ھچبر در نئیت۔
لبزانک ءِ پَٹّ ءُ میدان۔۔۔۔ سک پراہ ءُ شاھگان اِنت۔ ھر کس ءَ رضا اِنت کہ ۔۔۔ وتی بور ءَ بہ تاچین اِیت۔ ھمنچو کہ زور ئِے مان ۔ گٹ نہ اِنت۔ بَلے اے گپ ءَ سرپد بہ بیت کہ :
بے آپ ءُ تام ءَ، تئی اولاک، پندے ہم، بُرّ اِت نہ کنت۔
بے گاز ءُ بے پٹرول ءَ ، شرتریں گاڑی ہم زور جَت نہ کنت۔
تُری، محکم تریں انجنے بندوک ئِے بہ بیت۔
ءُ نئیکہ لبزانک عیب ۔۔۔۔ تاں دیراں مانیت۔۔۔۔
پَدّر ءَ بیت۔
ترپل بیت۔
ءُ لیپگ بیت۔ ۔۔۔۔
ءُ ھما دمان ءَ سڑگ ءُ بُرگ ءَ شروع کنت۔
“تئی لبزانک” تئی جندئیگ اِنت۔
بلکیں تئی جند اِنت۔
تئی “اندر” اِنت۔
تئی تہہ ءِ عکس اِنت کہ:
تئی ڈنی نیمگ ءَ زیبا کنت۔
تئی سر ءِ “گوات” اِنت۔ تئی” نپر”، تئی “شخص” ءُ کَڑک ” اِنت۔
ءُ اِے “داد” ءِ سزاوار، ایوک ءَ ، ساچشتکار اِنت، ازمکار اِنت۔۔۔۔ دگہ کس نہ اِنت۔
من وتی لبزانک ءِ شہر وت جوڑ کتگ۔ ایشی ءِ پسیل، من بستگ۔ ایشی ءِ آزمان ہم من سرا داتگ۔ ایشی ءِ ھر گوانزگ من شَر کتگ۔ ءُ یک یک کبرے، ہم من دست ئِے وت جتگ۔ وتی دل ءَ اے شہر ءِ بادشاہ من اوں۔
من سزا دات کنیں۔
من ملام کُت کنیں۔
من لوٹیں کسے ءَ، داد ءُ دھشت دئیں۔
من آباد کنیں ۔۔۔۔ من ویران کنیں۔
کسّے منی لِمپاں گِیپت۔۔۔۔۔؟
بِلّے ھمے شہر کہ:
من دست ئِے وت جوڑ کتگ۔ آئی ءِ گوانزگ من شَر کتگ اَنت۔ آئی ءِ کبر، من دست ئِے وت کوچِتگ اَنت۔ آئی ءِ کارستاں ھَڈ ءُ پوست پِر کتگ۔ آ جامگ گورا داتگ اَنت۔ آ گویاک ءُ مارشت بکشاتگ اَنت۔
بَلے برے برے ۔۔۔۔۔
من ءَ نہ مَرّین اَنت۔
یک اناگہہ ءَ “الف” بنت ءُ اوشت اَنت۔ دست ءَ جان ءَ نئیل اَنت۔
نہ سَہڑ اَنت۔
جہل نہ کپ اَنت۔
اگاں زور پِر بدئیے:
وت کُشی کن اَنت۔
وت ءَ گُٹو کن اَنت۔
وت ءَ لوپے ءَ درنج اَنت۔
گورمے ءَ دَور کن اَنت ءُ وت ءَ جہندمی کن اَنت۔
دُور اوشت اَنت ءُ ، منی بیوسی ءِ سرا کند اَنت ءُ ملنڈ کن اَنت۔
“مئے گوما، اِینچو مانجائی مکن ۔۔۔ اوپار ءِ اوں یک حَدے است۔ ۔۔۔ ما تئی دست ءِ لیبو نیاں کہ تئی ھر گپ ءَ بہ مَنّاں۔”
مَن، آپ ءِ تہ ءَ پوڑے ءِ پیم ءَ بیں۔ ۔۔۔
کسے ءَ آپ ءِ تہ ءَ پوڑ دیستگ۔۔۔۔۔؟
چارگ کرزیت بزگ ھما وھد ءَ ۔۔۔
دل گُشیت کہ:
دست ئِے وت جوڑ کتگیں اے شہر ءَ چپی کن۔ ۔۔
بَلے نوں اِے شہر ءِ کارست ھمنچک رُستگ ءُ تمرد بوتگ اَنت کہ:
گوں من مَرّینگ نہ بنت۔
ایشاں ھمنچک سگّ اِتگ ءُ اوپار کتگ۔
ایشانی گناہ ءُ میار ہم نہ اِنت۔
نوں ھما حداں رَستگ اَنت کہ گوں من، یک ءُ دو ہم کن اَنت۔
ھساب ءُ داد ءَ ہم گِر اَنت۔
“مارا پرچا تو مُپت ئِے حُدا بندیگ کتگ؟
مارا پرچا آزات نہ کن ئے؟”
ایشاں منی تام کش اتگ۔
“من شمارا بندیگ کتگ؟
شما من ءَ را دو چپگو کتگ۔ منی واب ءُ آرام برتگ۔ ۔۔۔ من ءَ چہ کٹ ءُ دھندھے ءَ پِرینتگ۔ ۔۔ اِے وَ ھما بساط اِنت کہ:
؎ من نہ گِہ دُز۔۔۔۔ دُزّ ءَ من ءَ گپت۔
برو اِت، ھمانگو کہ شما اتکگ اِت۔۔۔ رضا اِنت شمارا، منی دُمبل ءَ یلہ کن اِت۔ حدا ءِ واستا”
من گوں تہلی ءُ زھریءَ پسو دئیں۔
“شَرّیں مارا قبول اِنت۔۔۔ ما یلہ دئیں تئی دُمبل ءَ
بَلے
ڈُرین وتی اِے بندی جاہ ءَ
پروش وتی اے پسیل ءَ
کروج مئے سر ءِ آزمان ءَ
آچ دئے دست ئِے وت جوڑ کتگیں گوانزگاں کہ تو پہ یک مُرادے جوڑ کتگ اَنت۔ ءُ ایشانی آچ دَئیگ ءَ، تئی دل بہ تَرکّیت ءُ ٹکُر ٹکُر بہ بیت۔ ۔۔۔۔ بار دئے۔۔۔ اِے جتگیں کبراں کہ تو مئے واستا گوں ارسیگیں چماں جتگ اَنت۔
مارا سوگِند اِنت۔۔۔۔۔ نیایاں ما، تئی واب ءُ ھیالاں۔۔۔۔ تئی شہر ءِ میتگ ءُ دمکاں۔
بَلے بندات چہ وتی نیمگ ءَ بکن”
اِے گپ، من ءَ منظور نہ اِنت۔ من دست ئِے وت چے پیم بُن دات ئِے کنیں۔ منی کلیں مڈّی ءُ متاہ ھمے شہر اِنت کہ منی وتیگ اِنت۔ ۔۔۔ من ءَ دگہ چے است۔ بید ئِے ھمے آباد کتگیں شہر ءَ ۔۔۔۔ ھچّی نیست!!
تو وتی دستانی سیالیچکاں، مئے دیم ءَ پرچا مُش ئے ۔۔۔۔۔ ءُ یات بکن ھمنچک ڈامبر تو مئے دیم ءَ بہ مُش ئے۔ ما ھمنچک ترپناک ءُ رژناہ تِر باں۔
ما شَرّی ءَ سرپداں !
مئے ڈُبہ ءَ تو وتی نازرک ءُ ناتوانیں کوپگاں زرت نہ کن ئے۔۔۔
دریگتے تو مئے واب ءَ میاتکین ئے، یا کہ ۔۔۔۔۔ دریگتے تو مارا واب ءَ مہ دیستیں۔
دریگتے تو مئے سر سِستگیں ارواح ءِ چیہانٹاں سرپد بوتین ئے۔۔۔”
من یاتے ءَ کپیں کہ:
“شما بور اِت سوگِند ءَ ۔۔۔ کہ شما وت نہ مَنّتہ کہ، ما ھر شپ، ترا واب ءَ گنداں؟”
نوں زانیں کہ ایشانی کِرّ ءَ دگہ جواب نہ بیت۔
“پرچا، ترا واب ءَ مہ گنداں ، باریں؟
تو مارا ساچِتگ۔
تو مارا ودی کتگ۔
تو مارا سازِتگ۔
تو مارا ساٹِتگ۔ ۔۔۔ ءُ تو مارا پہریزِتگ۔
نوں، تو وتی کتگین آں، پَشل ءُ پشومان ئے؟؟
ما، ڑے کد ئِے، “مِرچُکؔ” ءَ نباں۔
آئی ءِ باروا، تو نبشتہ کتگ کہ:
چیزاں، نام ءُ نامدات دئیگ المی اِنت۔۔۔ اگاں ناں۔۔ بے نامدات ءَ ۔۔۔ چیز، گار ءُ گُمسار، بنت۔۔۔
بِلّے ما گار باں؟
ما بِلّے، پراموش باں؟”
یک سبزہ رنگ ءُ وش بندیں جنکے پاد کئیت ءُ اوشتیت۔
“ترا یات اِنت؟ یک گرماگی نیمروچے ءَ، من تئی کارگس ءَ اتکوں۔ تئی کِرّ ءَ، کس نیست ات۔ من شُکرے گپت۔
باریں تئی کِرّ ءَ، من پرچا اِے گپ ءِ گُشگ ءَ اتکگ اتوں؟ من ءَ پرچا گوں تو اِے گپ ءِ کنگ ءَ لج نہ بُوّگ ءَ ات۔
اِے گپ من ءَ کسے ناں کسے ءَ گُشگی ات۔ منی دل ءَ چہ ترا ، گہتریں مردم نیست ات کہ اِے گپ ءَ گوش بداریت ءُ سرپد بہ بیت۔ من اِے گُشگ ءَ گوں تو ھچ چک ءُ پد ہم نہ بوتوں کہ:
یک مارے ۔ ھر شپ کئیت ءُ ، من ءَ بگل ءَ کنت ءُ وپسیت۔
منی تیوگیں جان ءَ گوں وتی زھریں لِلک ءَ چَٹّیت۔
وھدے من سبز تَرّگ ءَ لگیں۔ ۔۔ من ءَ را تیوگ ءَ گوں وت پتائیت۔ وتی مارجینیں زبان ءَ ۔۔۔ منی لنٹانی بینگاں چونس اِیت۔
وتی تیوگیں زھریاں، منی جان ءِ تہا شنگین اِیت ءُ بینگاں چَٹّیت ءُ چَلپّیت۔
گوں بام ءِ ٹک ءَ ، منی دوئیں گورانی نیامجین ءَ ڈنگے جنت ءُ من ءَ، دوہمی شپ ءِ وداریگ کنت ءُ پُشت ءَ مان دنت۔
اِے چونیں قصہ ءُ اسرالے کہ گوں من بُوّگ ءَ اِنت؟۔
دگہ اِے وڑیں کارست تئی گورا اتکگ؟
ایوک ءَ مار منی واب ءَ کئیت یا کہ ۔۔۔۔
تئی گوشاں، مُورے ہم نہ وارت!!
تئی ھیال ءَ من قصہ یے نہ کرزیں؟”
اَے سبزہ رنگ ءُ وش بندیں جنک!
تو راست گُشئے ۔۔ یک نیم روچے ءَ تو اتکگ ات ئے۔۔ منی کارگس ءَ، دُتک!!
بَلے بید ئِے پَشلی ءَ ، من دگہ چے گُشت کنیں۔ !!
“من ءَ را، تو سوچ ءُ جہندم کن۔ بَلے جعفر نورؔ شہید ءِ جنوزام ءَ تو بے ھال کت کن ئے؟
کہ ھر روچ، تئی چمانی دیما گوزیت کہ:
مرچاں وتی مرد ءِ کشندہ ذاکر سائیکوؔ ءِ لوگ ءَ اِنت؟۔ ھر شپ گوں سگریٹاں داغ دنت ئِے؟
انگتہ گوشدارگ لوٹ ئے؟
گڑا، وتی کرّیں گوش ءُ کوریں چماں شَرّی ءَ پچ کن ءُ گوشدار۔ ۔۔۔۔ ءُ بچار کہ:
تئی چاگرد چون اِنت؟ تو، آ روچ ءَ قیامت ءَ بے ھال کُت نہ کن ئے کہ:
تو نشتگ ءُ ناشتہ کنگ ءَ ات ئے کہ یک کُچکے ءِ دپ ءَ یکروچی نُنکے ءِ دستے اَت۔ کچک ئِے چیچلینگ ءَ ات۔۔۔
دنیا زانت کہ: ما، تومیں۔۔۔ وھدے مارا زمین ءِ چیر ءَ کنڈ کن ئے۔۔۔۔۔ ما تِج بیں، ءُ در کائیں۔