سید بندیک انت پرچا ؟ ءُ داں کدی ؟ .... خیرجان خیرول

سید بندیک انت پرچا ؟ ءُ داں کدی ؟
خیرجان خیرول
ھما روچ ءَ که سید ءِ اے بُت ءِ دیمدرائی پروگرام بیتگ ، من ہم اے پروگرام ءَ گون بیتگاں گوں ۔ اَنچوکہ دُرستاں اکس کشی کتگ منی ہم دل ءَ بیتگ کہ من سید ءِ یک شوکیں اکس ے بگراں بلے آ دمان ءَ رش باز بیتگ پدا دیمدرائی پروگرام ءَ مئے اکیڈمی (خیرجان آرٹ اکیڈمی ) گون بیتگ گڑا ماں زیت ءَ شُتگیں ھال ءِ پروگرام ءَ ۔
دومی روچ ءَ مھلوک ءَ درائیں فیس بک سرا زرتگ اَت کہ ۔۔۔۔ اے وا سید ءِ بُت نه اِنت ۔۔۔۔ اے سید ءِ رَنگ نه اِنت ۔۔۔۔۔۔۔۔۔
ھمے چست ءُ اِیراں ۔۔۔۔۔ چار ءُ ناچار منی ہم دماگ ءَ نشت کہ ھو ۔۔۔۔۔ اِے سید ءِ رنگ ءَ نه جنت ۔۔۔۔۔ بلے پدا ھم دل تسلا دات کہ ۔۔۔۔۔۔ چی بیتگ زاناں اِے یک آرٹ ے ۔۔۔۔۔ مردم اَنچائیں سِنگ ءُ چوٹ ءُ چپوٹیں بُتاں وتی ھُدا کن اَنت ۔۔۔۔ اِے پدا ھم سید ءِ چارگ ءَ جَنت ۔ ہرکس ہرچی بگُشیت بلے نی اِے سید اِنت ۔۔۔۔ بزاں اے بت سید ئیگ اِنت ۔۔۔۔۔
منی دل ءَ ہرکس وھدے چدا چه گوزیت گڑا آ یک چمّے سید ءَ چاریت ۔ اگن بلوچ دوست ے بیت گڑا الم دمان ے سید ءَ ءُ سید ءِ کاراں گیر کاریت ءُ یات کنت ۔۔۔۔۔۔یاکہ یک اکس ے سید ءِ کشیت ۔
من ھم وھدے چدا چه گوزاں گڑا من ءَ ھم سید یات کیت سید ءِ ھما کوٹی یات کیت کہ سید ءِ کتاب ایر بیتگ اَنت ۔ ءُ مئے لیب جاگہ بیتگ ۔۔۔۔
جی ھو سید ءِ برازتک واجہ نادر شاه ھاشمی کہ مرچاں مسقط ءَ اِنت ۔ ما دوئیں کسانی ءَ چه ھور رُستگ ءُ مزن بیتگیں ۔۔۔۔ نادر شاه ءِ مات ءِ‌ مات ءُ منی پت ءِ مات دوئیں گنز دران ءِ بیتگاں دوئیں وت ما وت سیاد بیتگاں پمشکہ من ءُ نادر شاه کسانی ءَ ہور بیتگیں ءُ انگت ھم سنگتیں ۔۔۔۔ پمشکہ منی بازیں یات گوں نادر شاه زئیانی ھمے لوگ ءَ بندوک اِنت ۔۔۔
آ وھد ءَ من سید نه زانتگ ۔۔۔ ءُ نا کہ من بلوچی وانگ زانتگ ۔۔۔۔۔ بازیں پیتی ے ھمدا اِیر بیتگ ما مدام کتاب دَر جَتگ ءُ چاراِتگاں ، ما بس فوٹو والا کتاب ءُ میگزین پٹ اِتگ اَنت ۔۔۔۔۔ پدا وھدے کہ ما مَستر بیتگیں گڑا لہتیں اَنچیں کتاب ھم ما پَٹ اِتگ کہ ما وَنت کتگاں ۔۔۔۔۔۔۔ بلے وھدے کہ من سید ظہور شاہ ھاشمی ءِ علمی کچ زانتگ گڑا اِے وھدی نادر شاه گوں وتی درائیں لوگ ءِ مردماں مسقط ءَ شُتگ ۔۔۔۔۔ اِے لوگ بس اَنچو بند بیتگ اَنت ۔۔۔۔۔ من ءَ یک رندے پدا موہ رستگ اَت ھمے لوگاں روگ ءِ من پدا لہتیں کتاب دَرجَت ءُ زُرت بلے چو کہ اِے دگہ چیز بند اِت اَنت ۔ من ھمے اُمیت کت کہ کہدہ فتح ءَ یا کہدہ محمد ءَ چه اجازت گِراں ءُ چابیاں زیراں گڑا کایاں ۔۔۔۔۔۔۔ بلے تنا وھدی باز دیر گوست ، من ھم باز برا گوادر ءَ نه بیتگاں کہدہ فتح اَنچو ھم کراچی ءَ بیتگ باز کم گوادر اَتکگ ۔ کہدہ محمد برے گوادر برے مسقط ءَ بیتگ ۔۔۔۔۔۔
باز دیر ءَ رند معلوم بیتگ کہ بندی ءِ سبب ءَ اِدا بازیں چیزے دُزی بیتگ لوگانی ایندگہ ساماناں اَبید سُھر پُچ ھم برگ بیتگ اَنت ءُ پدا سید ءِ فوٹو البم ھم برگ بیتگ اَنت چیزے فوٹو که سید ءِ فیس بک ءَ شنگ اَنت ھمے گارین اَنت ۔۔۔۔۔ پدا رَند ءَ اِے لوگ دگہ مردماں باڑہ ءَ گون بیتگاں گڑا اِے لوگانی تہا ھچ چشیں چیزے پشت نه کپتگ اَبید دَر ءُ دِیوالاں ، داں یک روچے ھمے ھم ڈورات ءُ ہلاس بیتگاں ۔ دومزنیں شیریش اِے لوگاں مان بیتگ یکے کہدہ محمد ءِ‌ ڈیکی ءِ دیما بیتگ ءُ یکے سید ظہور شاہ ءُ اکبر شاه ءِ کوٹی ءِ دیم ءَ بیتگ ۔ اِدا یک شیکوگ ے بستگ که درائیں چُکاں شیک اِتگ ۔ داں ھمے شیریش ھم ہشک بیت ءُ پرشت اَنت ۔۔۔۔
بس من وہدے کہ سید ءِ بت ءَ که گِنداں گڑا من ءَ سید ءِ ہمے ہالیگیں کوٹی که کتاباں چه پیریں پیتی ایر بیتگ بیتگ انت، گیر کیت ۔۔۔۔‌ بگندئے کہ من سید دیستگ بلے من داں ہوش کتگ سید گوادر ءَ نه بیتگ ۔ من سید ءِ مرگ ءِ ھال ءَ ھمے شیریش ءِ چیرا سہی بیتگاں کہ ماسی ءَ من ءَ جُست کت کہ تو ظہور شاہ دیستگ من گشت کہ هو ۔۔۔۔ گڑا ماسی ءَ من ءَ جست که تو کجا دیستگ ؟
من گوشت کہ بازار ءَ دکان ءَ قلم کاپی بھاہ کنت۔
گڑا ماسی ءِ چک ءَ کمے منی سرا کند اِت ءُ گُشت کہ اِناں اِے ظہور شاہ نه اِنت ، اِے دگرے ۔۔۔۔۔ ظہور شاہ اِدا نه اِنت ظہور شاہ مرچی وفات بیتگ ۔۔….. من ھما وھد ءَ ھیران بیتگاں کہ نه زاناں پرچا ماسٹر عزیز صاحب ءِ کماش واجہ حیدر ، من ظہور شاہ سمجھ اِتگ ؟ بگندئے اِے واست ءَ که منی دل ءَ واجہ ۔۔۔۔ سید ءِ رَنگ بیتگ یا کہ دوئیں کمے یک رَنگ بیتگاں ۔۔۔۔۔ اِدا چه من سرپد باں کہ من سید الم دیستگ وتی سکیں گوانڈو ئی ءَ ۔۔ اگاں ناں گڑا چوکہ من سید ءِ اکس وا ھما وھداں دیستگ اَنت نام من مدام اش کتگ ۔۔۔ ہمے واست ءَ زاناں ۔۔۔
بس پمشکہ من که سید ءِ ھمے بُت ءَ گِنداں گڑا من ءَ سید ءِ جند یات کیت ، ناں کہ آئی ءِ لبزانکی کار ، ءُ ناں کہ آئی ءِ اکس ۔۔۔۔۔۔۔۔۔ بس ظہور شاہ ۔
بلے من انگت سید ءِ ھمے بُت ءِ یک شریں اکس ے ھم نه کش اِتگ نه زاناں پرچا ؟
سید ءِ زند ءَ سید ءَ گوں بازیں لبزانکی مردماں بازیں اختلاف داشتگ بلے سید ءِ گوں کس ءَ دژمن داری نه بیتگ ۔۔۔۔۔ ءُ انی۔۔۔ دُرست سید ءِ منوک اَنت ۔ سید ءِ‌ سر ءَ مردم پی ایچ ڈی کنگ ءَ اَنت ۔۔ نه زاناں کہ اے بُت پرستی ءِ زمانگ ءَ سید ءِ بُت ءِ دژمن چه کجا اَتکگ ۔۔۔۔کہ روچ ءِ رھمان مھلوک ءِ دیم په دیم بد بخت ءَ سید ءِ گوش ءُ بونز پروشتگ اَنت( یا کہ مئے گوش ءُ بونز بُراتگ اَنت ) بلے ھیر آئی ءَ یک ذمہ داری ے دئیگ بیتگ آئی ءَ پورا کتگ ۔۔۔۔ بلے نی بیا کہ مئے بُت سازاں کہ اے بُت سازاِتگ ۔۔۔۔۔‌ اے کُج اَنت ۔۔۔۔۔۔
اشاں نه زاناں پرچا سید گوں اِے چاریں بمبواں بندیگ کتگ ۔۔۔ اگاں شما که سید ءِ گوش ءُ پونزاں پدا پِر کت کن ات ، اِے سکیں شریں کارے گڑا زیت کن اِت ۔۔۔۔۔ ءُ اگن ناں اِے مشکلیں کارے یا کہ یکے شمئے دیما اوشتاتگ شمارا مکن کنگ ءَ اِنت گڑا شما وتی اِے مِک کتگیں بمبواں دیر کن اِت ، مارا سید که دوست بیت گڑا بے پونز ءُ بے گوش ءَ ھم دوست بیت ۔۔۔۔ چشی ءَ گشئے زاناں سید بندیگ اِنت ۔۔۔۔۔۔۔ اگاں سید بندیگ اِنت گڑا بزاں بلوچی بندیگ اِنت ۔۔۔۔
کساس دہ روچ ءَ گیش انت کہ من اے نبشتہ کتگ ۔۔۔بلے من شنگ نه کتگ کہ من نوکیں اکس ے بگراں بلے مو نه رستگ ۔۔۔پمشکہ گوں یک کہنیں اکس ے داتگ