صدر کراچی
صدر کراچی ءِ دل اِنت۔ اِد ءَ مردم ءَ ھر جاہ ءِ بس رسیت۔ ترا ملیر ءَ رؤگی بہ بیت یا نیول ءَ، کیّاماڑی ءَ رؤگی بہ بیت یا کورنگی ءَ، صفورہ گوٹھ ءَ رؤگی بہ بیت یا قائد آباد ءَ۔۔۔۔ صدر ءَ ھر جاہ ءِ بس دز کپیت۔ اِد ءَ وڑ وڑیں مردم ھم است۔ کسے ءَ مِٹھوے دیما اِنت ءُ کوکار ءَ اِنت کہ بیا اِت شمارا من شمئے قسمت ءِ حال ءَ دئیاں۔ ھما مِٹھو کہ وت ڈبّے ءَ بند اِنت ھما کیت ءُ مارا مئے قسمت ءِ حال ءَ دنت۔
کسے ءَ لھتیں گوج کُشتگ کہ بیا اِت، ”سانڈے کا تیل ہے“ سانڈے کا تیل بہ بیت ءُ اِد ءِ مردم مہ زور اَنت چوش نہ بیت۔ ”سانڈے کا تیل“ بہا کنوک ہمے تیلاں زوریت ءُ وتی لنککے ءَ چرپ کنت ءُ گوشیت بچار اِت منی لنکک چوں زنڈ بوت۔ شمئے سامان ھم انچو زنڈ بنت۔ سُور کرتگیں مردم دمانہ ءَ پِر رِچ اَنت ءُ تیلاں زور اَنت۔ ایشانی توک ءَ لہتیں ہما مردم اَنت کہ ”سانڈے کا تیل“ بہا کنوک ءَ داشتگ اَنت۔ دانکہ اے دگہ مردم رَد بور اَنت۔
دگہ دکان است کہ اود ءَ چیزانی بولی دَئیوکی اِنت۔ اِد ءَ بازینے ءَ رد وارتگ۔ من ھر وھد ایشانی کِرّ ءَ اوشتاتگ بلے بولی نہ داتگ۔ ایشاں جتگ بولی، 100 کلدار ءَ گھڑیال داتگ، من زانتگاں کہ اِے زوروک ایشانی وتی اَنت، بس ندارہ چارِتگ۔ دانکہ بیزاری بوتگ اَنت ءُ گوشتگ اِش تو بولی پرچا نہ جن ئے؟ من کند اِتگ۔ منی مول ءُ مراد ایشانی چارگ بوتگ۔
چشیں روچ نہ بوتگ کہ صدر ءَ شتگان ءُ یک مردمے ءَ ڈیک نہ داتگ ءُ نہ گوشتگ کہ تئی دیم دانگ اِنت بیا ترا دوائی یے دئیاں، تئی دانگ رؤ اَنت، من آئی ءِ دیم چارِتگ، منی دیم چہ آئی دیم ءَ بدتر نہ بوتگ کہ رَد بوراں۔
برے برے انچیں مردم دُچار کپیت کہ ریش اِش داشتگ ءُ بلاہ بلاھیں سوگند ور اَنت کہ من ترا انچیں دوائی یے دئیاں تو زنڈ ءُ جلواہ ناک بئے یا اے عینک کہ ترا چم ءَ اِنت ایشی ءَ تو انوں چگل دئیے۔ بس نماز وانگ ءِ وھد ءَ پمن دُعا بکن۔ من اِے دراہ زانتگ اَنت۔ بس کند اِتگ ءُ گوشتگ کہ من وت چمانی ڈاکٹرے یاں۔
صدر ءَ ایمپریس مارکیٹ ءِ کش ءَ فروٹانی ریڑی اوشتوک اَنت، ارزانیں نہادے ءَ فروٹ رسیت بلے بہا کنوک ءَ بگوش کہ من وتی فروٹاں وت گچین کناں، اگاں ناں۔ گڑا چار ءُ پنچ داگی ءُ سڑتگیں دانگ الم ھوار کنت۔ بلے ایشاں ابید ھم صدر زندگیں دیارے، کوکار ءُ سَلّی اِنت۔ مردم بَٹ ورگ ءَ اَنت، شربت ءُ سموسہ ورگ ءَ اَنت، بس کم کم ءَ جنزان اَنت۔ ہمد ءَ جہانگیر پارک اِنت، یک وھدے ویران اَت۔ بلے سرکار ءَ پدا آباد کت نوں فیملی پارکے۔ منی کماش وتی ورنائی ءَ کراچی ءَ بوتگ۔ نیمروچ ءَ ہمے پارک ءِ درچکانی ساھگ ءَ داشتگ ئِے۔ یک رندے من ھما جاھانی چارگ ءَ شتگ اتاں کہ کماش ءَ اود ءَ داشتگ۔ چہ ھمے جاھاں یکے جہانگیر پارک اِنت، من اود ءَ شتاں گڑا پارک ءِ سیکیورٹی گارڈ ءَ من ءَ گوشت ” من ترا اجازت بدئیاں اے پمنی نوکری ءَ جیڑھے بیت، اِے وھد ءَ اگاں فیملی یے رؤگ ءَ بوتیں ترا راہ داتگ ات۔ جنکے بزور ءُ بیا سیل بکن“
نیمروچے ات کس نیست ات۔ من ءَ ھم اِے جاہ نیمروچ ءَ چارگی ات۔ اے ساھت ءَ چشیں بانکے نیست ات کہ بہ زرتین ءُ پارک ءَ برتیں۔ پمیشکا واتر کت۔
صدر صدر اِنت، کوہنیں ھوٹل اَنت، بلوچ آئس کریم اِنت کہ نوں گُڈی ساہ ءَ اِنت، پارسیانی ھوٹل نوں ھلاس اَنت تہنا کیفے مبارک پش کپتگ آ ھم مکّی مسجد ءِ نزینک ءَ۔۔۔۔ من کراچی ءَ کہ باں صدر ءَ الم رواں، بلکیں اود ءَ چیز مہ گراں بَلے من ءَ پہ زندگی ءَ زھیر بیت، زندگی۔۔۔۔ ھما زندگی کہ صدر ءِ مردمانی کوکارانی تہ ءَ اوشتاتگ ءُ وت ءَ چارگ ءَ اِنت کہ من کجا اوشتاتگ ءُ کئے ءَ چارگ ءَ یاں۔
چندن ساچ
عکس: 1950 ءِ زمانگ ءِ عکسے
- گوادر کا موٹر سائیکل میکانیکوں کے بازار کا آج آخری رش ،کل ویرانی کا منظر … تحریر سلیمان ہاشم -نومبر7, 2025
- سید بندیک انت پرچا ؟ ءُ داں کدی ؟…. خیرجان خیرول -نومبر1, 2025
- حق دو تحریک کی جدوجہد رنگ لے آئی، میونسپل کمیٹی کا کھنڈرات دفتر جدید مگر تاریخی طرزِ تعمیر میں تبدیل ہونے جا رہا ہے -اکتوبر29, 2025
