اِزم ءِ قَدر ءُ قیمت
اسحاق رحیم
چہ کراچی آرٹس کونسل ءِ نیمگ ءَ بیوکیں اے سال بزاں ۲۰۲۵ ءِ ورلڈ کلچر فیسٹیول ءِ پروگرامانی تہ ءَ یک بیگاھے استاد نوربخش بینجو والا ءِ دیوانے ایر کنگ بیتگ اَت۔ اے دیوان ۷ نومبر ءِ شپ ءِ ۹ بج ءَ اَت ءُ اے دیوان ٹکٹ ءِ سرا کنگ بوت۔ بزاں ابید ٹکٹ ءِ زیرگ ءَ انچوش پہ دیم کس اے دیوان ءَ شُت نہ بیگ اَت۔ ٹکٹ ءِ نہاد ۳۰۰۰ کلدار ایر کنگ بیتگ اَت۔
مئے بلوچی میوزک پروموٹرز سوسائٹی ءِ سنگتانی نام نوربخش ءِ ٹیم ءِ سروک دانیال ءَ داتگ ات انت کہ ما مہمان ءِ ھساب ءَ اے دیوان ءَ بہر زُرت بکنیں۔ پرچاکہ استاد نوربخش اولی بر ءَ بلوچی میوزک پروموٹرز سوسائٹی ءَ چہ بیگواھی ءِ دنز ءُ مُجاں کشّ اِتگ ات ءُ ۶ اکتوبر ۲۰۱۸ ماں تربت ءَ سبزل سامگی ءِ دیوان ءَ آرتگ ات چہ ھمودا استاد نوربخش سوشل میڈیا ءَ زاھر بیت ءُ پدا حبیب یونیورسٹی ءِ دانیال ءَ دست گپت۔ اے وھد ءَ چہ پاکستان ءَ ڈنّ ماں یورپ ءَ آئی ءَ بازیں دیوان کتگ اَنت۔ یورپ ءِ بازیں مُلکاں دانیال ءَ استاد نوربخش ءُ آئی ءِ تمبورگی دوشمبے بُرتگ اَنت۔ آھاں گوں وتی بے مَٹّیں اِزم ءُ لنککانی کمال ءَ انگریز ناچ پرماتگ اَنت۔ وھدے کہ استاد نوربخش ءِ اے ازم پاکستانیاں دیستگ کہ یورپ ءَ مردم آئی ءِ قدر ءَ اے کَچّ ءَ کنگ اَنت پدا گُڑا آھاں ھم زانتگ کہ اے مردم الکاپیں ازمگرے۔ انّوں ماھے بیت کہ استاد نوربخش چہ یورپ َ اتکگ، آئی ءِ شرپ ءَ کراچی داں اسلام آباد ءُ ایندگہ شہراں پنچ شش دیوان بیتگ اَنت۔ اے دیواناں ھزارانی کچّ ءَ مہلوک ءَ بہر زُرتگ۔مرچیگیں دیوان ءَ ھم پنچ سد ءَ گیش مردم اتکگ اَت ۔ بلوچاں ھم نوربخش چہ یورپ ءُ پاکستانی دیوانانی گِندگ ءَ پد گیش دوست بیگ اَت۔
آرٹس کونسل ءِ مرچیگیں دیوان ءَ من، شمس الحق کلمتی، بہرام بلوچ، گلزار گچکی، خلیل تگرانی،اشرف محمود،عارف حکیم ءُ وحید نور ءَ چہ بلوچی میوزک پروموٹرز سوسائٹی ءِ نیمگ ءَ بہر زرتگ اَت۔ ما سنگت کہ ٹکٹانی چیک بیگ ءِ جاہ ءَ لین ءَ اوشتاتگ اتیں یک در بلوچیں ورنایے اتک ءُ جست ئے گپت
” استاد نوربخش ءِ پروگرام ھمدا بیگ اِنت”
ما گوشت ، ھَو
گوں استاد نوربخش ءِ نام ءِ اِشکنگ ءَ من ءَ کِسّہے گیر اتک۔
وھدے بلوچانی نامداریں سروزی رسول بخش زنگشاھی فرانس ءَ وتی ازم ءِ درانگازی ءَ روت گُڑا اودا آئی ءَ ایوارڈ دیگ بیت ءُ پہ شرپ آئی ءَ “ڈاکٹر رسول بخش ءِ نام بزاں پی ایچ ڈی ءِ اعزازی شرپ دیگ بیت۔ وھدے ڈاکٹر رسول بخش چہ فرانس ءَ پدا وتی ھَلک پہرہ(ایرانشہر) ءَ کَیت، وتی لوگ ءِ دمک ءَ آئی ءَ میتگی مردمے ڈیکّ دات گوں گِندگ ءَ جُست ئے کنت۔
ھال کن اُڑے رسولُک تو دیریں گار بیتگ ئے کُج ءَ بیتگ ئے ؟
رسول بخش وتی دل ءَ ھَیران ءُ بژنیگ بیت کہ من فرانس ءَ اے مرد ءِ قوم ءِ نام، زیمر ءُ شرپ بُرز کتگ ءُ پیداک آں۔ اودا دَریگاں پہ منی ازم ءِ شرپ ءَ من ءَ استاد ڈاکٹر رسول بخش بلوچ ءِ نام داتگ بلے اے مرد کہ منی وتیگ اِنت منی ڈاکٹری ءُ استادی وتی جاہ ءَ منی نام ءَ ھم سرجمی ءَ رسول بخش نہ کنت۔
استاد نوربخش ءِ مرچیگیں اے دیوان ءَ ھم پنجاہ در سد بلوچ ءُ پنجاہ درسد دری قوم بزاں اردو اسپیکینگ ءُ ایندگہ مہلوک اتکگ اتاں۔ بلے بلوچ درست آئی ءِ نام ءَ نُورک توار کنگ اَت انت ءُ دَری استاد نوربخش بلوچ۔۔۔
