لالو ھوٹل ۔۔۔۔۔۔۔ خیر جان خیرول

لالو ھوٹل
۔۔۔۔۔۔۔ خیر جان خیرول

ڈوریا گوادر ءِ دل انت گوادر چہ ھمدا شروع بیتگ , کس نه بیتگ بس ھمے مید ھمدا بیتگاں , بس ھمے گوادر بیتگ , گوادر بس ھمیشانی بیتگ ۔
ادا دو سہے ھوٹل بیتگ مئے یاتاں , عیسیٰ ءِ ھوٹل که یک مزنیں وھدے ءَ ملہباری ءَ گون بیتگ یک وردنی ھوٹل ے بیتگ درائیں شام سبارگ ءّ ناری میدانی ھمے ھوٹل ءَ بیتگ۔ ھمدا کپٹن رسول بخش ءِ چائے ھوٹل ھم بیتگ ءُ پدا درائیں چیز والا ھمدا اتکگاں بٹ والا جنین گوں وتی منجلاں بثے ، شیر ءُ مستگ ، دوگ ءُ ھپیتگ ، کیٹگ ءّ تیجگ درس ادا مچ بیتگ۔ بزاں ھرچ نیبگ ءِ موسم بیتگ آ نیبگ ھمے ڈوریا ءَ لازم بھاہ بیتگ ، سہب بیگاه ادا بازار بیتگ ۔
سہب ءَ درائیں دریا والا مید که چه زر ءَ واتر بیان بیتگ انت سنگاری یا سرءُ رندی داں نیم روچ ءَ ۔
تیاب دپ ءِ نیشتگیں میدانی اندازه بلکیں چم انچو تیز بیتگ انت اشاں دیر ءَ چه آیوکیں بزاں جنیل ءِ سنٹ ءَ که یدار ے درا بیتگ گڈا اشاں شری ءَ پج ءَ آورتگ که اے کئی یدار انت پیداک انت ۔
جنین سہت ءّ دمان گوں وتی گونڈیں چکاں تیاب ءَ اتکگاں وتی وتی مرد ءُ چک ءّ براتانی یدارانی چارگ ءَ که کیا مرچی چی آورتگ ۔ چک ءّ چوریگ مچ بیتگ په وتی پت ءُ براتاں کاڑی گرگ ءَ ۔
بلے درستاں چه گیش ادا سندر ءِ کبین ءُ لالو ھوٹل سک مشہور بیتگ انت ۔ اے دوئیں برات بیتگ انت سندر انگت است انت بلے لالو وفات بیتگ۔
انی ادا که اےمردم نیشتگ انت اے لالو ھوٹل انت پیسرا اے دگہ رنگ ے بیتگ ادا کا کا لالو ءَ چاه ، ملائی ، شربت ، کیٹگ، تیجگ ءُ دگہ بازیں چیزے بھا کتگ ۔
ڈوریا ءَ ھمے دور ءِ جنک ءُ بچک انگت لالوءِ ملائیاں یاد کن انت لالو ءِ وھدے که ملائی ھلاس بیتگ انت گڈا چکانی جنگ بیتگ ملائی ءِ منجل ءِ شودگ ءَ ، یک دو چک ءَ که منجل په شودگ ءَ رستگ گڈا بزاں آبانی عیش بیتگ منجل اشاں انچو چٹیتگ که شودگ نلوٹیتگ ۔
لالو ھوٹل سہب بیگاه میدانی دیوان جاہ بیتگ وتی دریاوردی سرگوست وتی ماھیگری ءِ بابت گپ ءُ ھبراں چه ابیدمسقط ءُ والی ، جن ءُ جاتیگانی کسہ گوشگ بیتگ انت ۔
خاص کر بیگایانی دیواناں لاتیں کسہ گوشانی مجلس بیتگ انت مردم انچش دلگوش بیتگ انت گوشے زاناں فلم چارگ ءَ انت ۔
اے جاگہ انگت لالو ھوٹل گوشگ بیت ، ڈوریا ءِ کوان تریں جاگہ آنی تہا بس ھمے لالو ءِ ھوٹل پشت کپتگ ءّ عیسیٰ ءِ ۔
لالو ھوٹل ءِ ھمے میدانی دیوان ، بلے نی اے دیوانانی تب بدل بیتگ مرچاں ادا نیندوک گیش ے سیاست ءَ نه انت ، ادا ملکی ءُ درملکی جاورانی سرا گپ بیت بلے گیشتر گوادرءِ انوگیں جاورانی ءُ گوادرءِ سیاسی لیڈر ءُ کاریندھانی پچ شودگ بنت ، کدی کدی لاتیں انچو جزباتی بیت کہ اشانی درائیں لوگ ءِ مردمانی پچاں شودانت ھمدا تاپا دینت۔
اے روچی ھم ناھدا ابوالحسن عرف بادشاہ پہ ٹوک ٹالی گوشگ ات کہ اے مئے راہ سرا چک پوسٹ خداداد واجو ءَ جتگ کہ ما مید دریا ءَ مروایں ، یک دو مردماں گوں باشاہءَ بحث کت کہ اے چک پوسٹ سرکارءَ وتی سہولت ءِ واست ءَ جتگ مئے شمے ریکاوٹ نہ بیت ۔
کماشیں ءُ نامانی ناھدا اسماعیل بھیا عرف واجو بھیا ءَ گوشت کہ چوں نہ انت کہ مارا سرکار دریا ءِ رؤگءَ نہلیت ، ماکجام ھم وھدءَ بیاایں وتی کارڈ ءَ پیش داریں دریا ءَ شت کنین ۔
بلے بادشاہ بضدات کہ نا چوں نہ انت ۔
بس ھمے فوٹو کہ من ھمے روچ ءَ کشتگ ات گڈا کمے روچ ءَ پد بزاں دوروچ پیش کہ ھمے نہ وشیں واقع بیتگ ات کہ سہہ گونڈیں چک شہید بیت بس دریا ھم بنت بیت بلکیں تیاب ءِ نزدیک ءَ کس ے نیشتگ ۔ مرچی تیاب ءِ واڑا کنگ ھم شروع کتگ ے ۔
مرچی بیگ ءَ دریا پچ بیتگ گڈا میداں وتی دریا ءِ رو آ بندات کتگ ۔ ھمے بے چارگیں مید وتی مدامیںگیں جاگہ بزاں لالو ھوٹل ءِ سرا نیشتگ انت ۔
مرچی من ھم تیاب ءَ روگ ءَ ات انت کہ من چاراں گونڈو مچوکائی ات انت ءّ سپاھیگ اشاں گلینگ ءَ ات انت من گڈا دو گونڈو ءِ دست گپت ءُ اشاں گوشگ ءَ ات انت کہ زیک سے گوندو مرتگ شما انگت سر پد نه بے ھمے دمان ءَ چاراں داں سیٹی ءَ توار کت من که سرا چست کناں داں ناھدا اسماعیل ءّ دگہ لاتیں مید چه لالو ھوٹل دراتکگ انت یک سپاھیگیں گوں لٹ ءَ اشاں سر دیان انت مناں واجو بھیا سک بزگ بیت ۔
ماشتیں تیاب ءَ چکر جت چیا کہ تیاب ءِ روگ ءَ کلگ ءَ ات بلے ھمدا ڈوریا ءِ دپ ءَ لالو ھوٹل سرا نیدگ ءَ نہلگ ءَ ات ۔
ما واتر بیتیں گڈا من چارات کہ میتگ ءَ ھمے درائیں مردم ٹولی ٹولی ءَ نیشتگ ات انت یک ٹولی ءِ تہا بادشاہ نیشتگ ات غلام شاه ھم ، من گوشت کہ ھاں غلام شاه آروچیگیں بادشاہ ءِ گپ راست۔ بیت ناں کہ اے مارا نہل انت ۔ غلام شاه ءَ گوشت کہ ھو یار ۔
بادشاہ وت پشٹائینگ ات کہ آروچی من چو چی ءَ گوشت ۔
کمے دیم ترا واجو بھیا نشتگ ات من گوشت کہ ھاں کا کا آروچی بادشاہءَ راست گوشت گندے که اے ترا تیاب ءَ نہلنت ۔
بھیا ھم شرمندہ شرمندہ ات ءُ گوشت ے که
ھو بھیا مارا گلینت ے یار ۔