ڈاکٹر عزیز ءِ گیر ءُ تْرانگاں .... اسلم تگرانی

ڈاکٹر عزیز ءِ گیر ءُ تْرانگاں

اسلم تگرانی

ڈاکٹر نزاناں ترا یات بیت اگاں نہ بیت بلے اولی بَراں من ترا دُرا خان ءِ پِش ھاربر ءِ بنگلو ءَ دیستگ ات۔ھُدامرزی ئیں عطا اللہ ءُ ایوب نندوک ات اَنت ۔تئی دلبند ءِ پُٹانی مزنی ءَ مُردنی من ترا جت ءُ ڈاکٹر علیم کت ۔ تئی گپ ھمنچک شیرکن ءُ تامدار کہ چہ آھانی سھراہی ءَ من تئی گپانی شیدائیءُ تئی دام ءِ چمگاں کپتاں۔۔من لوٹ ات تو گرم ءَ ھمودا بدار ئے۔۔بلے تو نہ داشت ءُ پد ءَ سیول اسپتال گوادر ءِ نادراہ جاہ ءَ تئی پوسٹنگ اَت ۔شھر ءِ ھَمُک مَزن داں کسان،جنوزان،سروزام، تئی در ءَ بے جُست ءَ پُترت ءُ در اتک اَنت –
گوادر ءِ ھلک ءُ کُوچگانی شْوانگ ءُ دریا وَرد دْرست چہ تو وش ءُ آشنا اِت اَنت۔ لَس مھلوک ءَ اَبید سیاسی کارکن سرکاری مردم ،پوریاگر، مید ءُ ،لبزانکی مردم تئی ساھگ ءَ وت ءَ نوان کنگ ءِ واھگ دار اِت اَنت تو تبیبے ءَ گیش، شاھزانتے اَت ئے ۔تئی شھزانتی ءِ راز ءَ ھما روچی من پُوہ بوت آں کہ گوادر ءَ یک سمینارے ءَ مات ءِ گور ءِ شیر ءِ اَرزِشت ءِ باروا تْران کُنگ ءَ ات ئے،۔گڈ ءِ ھمے روچ ءَ من تئی مرید ءِ بوتاں ،تئی گپانی ایر کنگ ءِ داب من ءَ وش بوت۔ تو گشتانک دیگ ءِ ازم ءَ سوھو ءُ سرپد اِت ئے۔یک روچے جیوز گوادر ءِ کارگس ءَ من آزمانکے ونت۔ کہ آئی ءِ نام “زگرانہ ءِ دَپ ءِ بنداتگیں شِریش” اَت۔۔۔ھمے کِسّہ ترا سک باز دوست بُوت۔۔۔۔ تو چُوش ھم گْوشت کہ “من ءَ اے آزمانک ءَ یک گیر ءُ تْرانگے ءَ پِرینت”۔
پد ءَ جیوز ءِ مراگش ءَ گوادر ءِ دریا وردانی باندات ءُ آھانی پُل اِتگیں زمینانی باروا تْران بُوت ۔ وھد وتی پند ءَ گوں تْرندی ءَ جنان ءُ گوزان اَت ۔یک روچے گھرام حیات اَتکگ اَت لوٹ ات ئےِ ترا بِہ گِند اِیت۔ تئی کلینک گَلَگ نْیادی ءِ نزیک ءَ اَت۔ کہ دیم ءِ دار رمیزاں گْور جتگ اِت اَنت۔ بلے تئی پکیری در، نادراہ جاھے ءِ ھمرائی چاگردی ءُ سیاسی مردمانی بھیٹک ءُ اوتاگے اَت ھم ۔

ما چاہ وارت ،پد ءَ چہ اود ءَ جِست اِنت۔ تو وتی کلینک چہ اود ءَ لَڈینت نیوٹاون ءَ آورت۔من باز براں چہ ھمود ءَ گوستگ آں ، بلے دیوان دِری ءَ مُوہ نہ رَس اِتگ، ھمے میان ءَ بی این پی مینگل کیچ ءِ جلسہ یے بُوت،گْوادر ءِ اھوال کار ھمے جلسہ ءِ کوریج کنگ ءَ نور محسن ءِ سروکی ءَ تُربَت ءَ شُت اَنت، سِتک بزان کہ من تئی گْرانبھائیں گپانی گوش دارگ ءَ شُتاں-
جلسہ ھلاس بُوت،تو دیم گوں ڈاکٹر غفور ءَ کت کہ اے ورناہ تقریراں گوں ھِیرتی ءَ دلگوش کنت۔باریں مرچی ڈاکٹر غفور ءِ گشتانک چون اَت۔من مسکراہ کت ءُ چو ڈیزل انجن ءِ وڑ ءَ میزان میزان ءَ پُر بوان ات آں۔بلے کنڈگ ءَ سر نہ کپت ،ہر دوھیناں کَند ات ۔۔۔۔!
ڈاکٹر!
منی گوں تو دلجمیں دیوان واجہ محمد حیات ءِ چکانی ،ڈاکٹر دوستین،شیھک حیات ءِ آروس ءِ شپ ءَ بوت۔ڈن ءَ اسلم اسد ءَ کسانین میوزکی پروگرامے برجاہ کت ءُ آروس ءَ اتکگیں مھمان ملما کت اَنت ،اے تانسریں شپ من تو دیوان کت،یک جستے ھلاس نہ بوت،پد من دومی جست کت ،دل ءَ نہ گْوشت کہ اے شپ آسر بہ بیت۔ملا ءِ بانگ ءَ واجہ محمد حیات اتک ، ترا زور پاد ئےِ کت ۔ کہ دمانے تاہیر بگر اِت۔ من اَجب ھیران اتوں کہ تو چوشیں دبستانے بیتگ ئے۔بَلے مردماں نیکہ تئی پارٹی ءَ تئی بستار زانتگ۔۔!

بلوچ چوناھی ءَ پہ مُردگ دوستی ءَ نامدار اَنت۔ تئی رپتن ءَ پد باز براں من باتیل ءِ بن ءَ شتگ آں ، من کے بی فراق گوں کتابے ءَ تئی سَرون ءَ دیستگ،من ھمے گُمان کتگ،بگند ئے شپ ءَ تو آئی ءِ واب ءَ اتکگ ئے ، تئی ڈَکّ انگہ کس ءَ نہ گپتگ، بگند ئے اے شھر نوں سَنٹی ءَ دپ جتگ ۔ ماہ رنگ گوں ھمراھاں انگہ بندیگ اِنت۔سمی دین گوں بریں دزگھاراں اسلام آباد ءَ زھر شانی ءَ نشتگ ءُ راست گُوشی لھتے روچ اِنت گوادر ءَ تاہ آپی اِنت ءُتئی پارٹی چَٹءَ ھاموش انت۔۔